Hawlfraint

Alla i uwchlwytho unrhyw eitem i wefan Casgliad y Werin Cymru?

Rhaid i chi roi cadarnhad i ni bod hawl gennych i uwchlwytho'r eitem i'r wefan drwy gadarnhau eich bod wedi darllen y Telerau Defnydd a Phreifatrwydd a'r Canllaw Hawlfraint. Os hoffech chi unrhyw gyngor neu ganllawiau pellach, cysylltwch â ni.

Rhaid i unrhyw gynnwys ar y wefan hefyd gael ei drwyddedu yn unol â thelerau defnydd addysgiadol ac anfasnachol y Drwydded Archif Greadigol. Gofynnir i gyfranwyr gytuno i'r telerau yma cyn uwchlwytho eu cynnwys.

 

Alla i ddefnyddio'r eitemau ar y wefan?

Mae pob eitem ar Gasgliad y Werin Cymru wedi ei gwarchod dan amodau cytundeb y Drwydded Archif Greadigol. Darllenwch dudalen y Drwydded Archif Greadigol am ragor o wybodaeth am y drwydded a pha hawl sydd gennych i ddefnyddio'r eitemau ar y wefan yn ôl y cytundeb trwyddedu.

 

Esiamplau o Hawlfraint ar waith

  1. Rydych wedi derbyn llythyr gan Mr. Evans. Chi sy'n berchen ar y llythyr fel gwrthrych real felly chi yw'r ‘Perchennog'. Fel awdur y llythyr, Mr Evans yw ‘Deiliad Hawliau' yr eitem; yr ‘hawlfraint' yn yr achos hwn. I gael hawl i ddigideiddio'r llythyr a'i gyhoeddi ar wefan Casgliad y Werin Cymru rhaid i chi gael caniatâd Mr. Evans. Caniatâd ysgrifenedig sydd orau. Mr Evans fydd ‘Deiliad Hawlfraint' y llythyr tan 70 mlynedd wedi diwedd blwyddyn galendr ei farwolaeth. Wedi'r dyddiad hwn, bydd yr eitem allan o hawlfraint.
  2. Llongyfarchiadau! Rydych chi newydd brynu paentiad gwreiddiol gan Kyffin Williams am £10,000. Rydych chi am greu copi digidol o'r paentiad a'i roi ar wefan Casgliad y Werin Cymru. Ond wnaethoch chi ystyried bod hawlfraint gwaith Kyffin Williams wedi'i drosglwyddo i Lyfrgell Genedlaethol Cymru cyn ei farw? Yn yr achos hwn, chi yw ‘Perchennog' y paentiad fel gwrthrych real, ond i greu gwaith deilliadol (copi) o'r paentiad rhaid i chi gael caniatâd Llyfrgell Genedlaethol Cymru sef ‘Deiliaid Hawliau' gwaith Kyffin Williams.