Cerdyn post yn dangos milwyr o Bow Street, 1915

Disgrifiad

Danfonwyd y cerdyn post hwn gan William Hughes at ei gyfaill T I Rees (a oedd gyda'r gwasanaeth diplomyddol, gan weithio yn y Llysgenhadaeth Brydeinig yn Venezuela). Mae'n dangos grŵp o filwyr, y rhan fwyaf ohonynt o Bow Street, y tu-allan i'w llety ym Mhorthcawl. Eistedda William Hughes ar ochr chwith (fel yr ydym yn edrych) y ddynes (merch perchennog y llety); mae ei frawd Tom Hughes ar ei hochr dde. Mae tri chefnder iddynt yn y llun: John Thomas-Davies (yn sefyll, yr ail o'r chwith), George Owen (pedwerydd o'r chwith) a John Lewis (seithfed o'r chwith). Gellir enwi dau ddyn arall o Bow Street, sef Griff Hughes (wythfed o'r chwith) a John James (ar y llawr, ar yr ochr dde). Ar gefn y cerdyn mae William wedi ysgrifennu (o 12 Oxford Street, Y Fenni): Daethom yma heddyw. Nid ydym yn lletya yn yr un lle nawr. Yr ydym yn ddau yma. Y mae Tommy a George yn yr un man. Nid wyf wedi gweld y lleill eto. Dyma ddarlun ohonom yn Porthcawl a'r ferch fel mascot yn y canol. Yr oedd yn chwith gennyf ymadael â Porthcawl. Yr oedd gwraig y tŷ a'r ferch yn llefain fel plant pan ymadawon. Gwrddwn ni fyth â gwell boneddiges, er fod y wraig yma yn ymddangos yn garedig iawn. Gobeithio'r gore. Llawer oerach yma na Porthcawl. W Hughes