Cricieth- MANTELL PABIAU COCH
Ar ddiwedd y prosiect i goffáu’r heddwch ar ddiwedd y Rhyfel Mawr 1918-2018 penderfynodd y dref i goffáu 75 mlynedd ers diwedd yr Ail Ryfel Byd ym 1945. Oherwydd yr ynysu cymdeithasol yn sgîl COFID-19 roedd rhaid gohirio’r gweithgareddau cymdeithasol, gan gynnwys y te pnawn i’r hen ac ifanc yn y Neuadd Goffa, dadorchuddio mur o babïau crosio ac arddangosfa yn y Stryd Fawr. Serch hynny, bu’n bosib rhannu’r cynnyrch a’r gorchestion drwy fideo o’r holl waith a rannwyd ar y cyfryngau cymdeithasol ac ar YouTube ar Criccieth Life. Bu hefyd ddarllediad o’r gwaith ar raglen Heno S4C ar Fai’r 8fed. Gwnaethpwyd apêl i’r gymuned am wirfoddolwyr i helpu i droi’r dref yn goch i goffáu 75ain penblwydd Diwrnod VE gan wau a chrosio pabïau. Ysbrydolodd y prosiect drigolyn lleol, Susan Humphries, i greu Gŵn Pabïau, a throdd y 5,000 pabi a wnaed gan dros 150 o wirfoddolwyr yn odre (train) trawiadol i’r wisg. Meddai Liz Saville Roberts A.S.: “Mae’r wraig yn symbol o’r golled a ddioddefwyd gan gymuned gyfan. Yn gwisgo’r Gŵn Pabïau mae hi wedi ei lapio yn y galar y bu raid i gymaint o ferched ei ddioddef.”

Ysgrifennwyd gan Dr. Catrin Jones Clerc y Cyngor Mehefin 2022.
Mae Cyngor Tref Criccieth wedi derbyn gwobr i gydnabod ei gyfraniad arbennig i'r gymuned yn ystod y pandemig Covid-19. Mynychodd y Cyng. Sian Williams, Cadeirydd y Cyngor Tref a Dr Catrin Jones Clerc y Cyngor Tref y 'Digwyddiad Dathlu a Diolch i Wirfoddolwyr' a gynhaliwyd gan Mantell Gwynedd yn Galeri, yng Nghaernarfon, Gwynedd, ar 6 Mehefin i dderbyn y dystysgrif.

Datganiad o’r Sennedd
Yn 2020, cafodd llawer o ddigwyddiadau Dydd y Cofio eu canslo oherwydd Covid-19.
Yn hytrach, daeth trigolion yng Nghricieth, Gwynedd, at ei gilydd i lunio mantell o flodau pabi a gafodd ei harddangos fel rhan o arddangosfa ar y Stryd Fawr i nodi Dydd y Cofio.
Fe wnaeth gwirfoddolwyr o'r gymuned wau a chrosio 5,000 o flodau pabi a gafodd eu hymgorffori yn y ffrog.Mae'r fantell ei hun yn symbol o golli cymuned gyfan ac mae'n arbennig o ystyrlon i genhedlaeth o fenywod a gollodd anwyliaid yn ystod y Rhyfel Byd Cyntaf a’r Ail Ryfel Byd.
Gan dynnu ar ddoniau unigolion o bob cenhedlaeth ac o bob rhan o’r gymuned, roedd y prosiect yn un o nifer a arweiniodd at lwyddiant ysgubol Cricieth Creadigol wrth ennill Gwobr Bywydau Creadigol Cymru 2021.Yn awr, bydd Mantell o Flodau Pabi Cricieth yn cael ei harddangos yn y Senedd fis Tachwedd eleni fel rhan o’r digwyddiadau i nodi Dydd y Cofio 2022.

Delweddau:
1. Pam Mayo, Susan Hymphreys, Margaret Rees. Catrin Jones (llun Andy Kime).
2. Diwrnod Cofio'r Neuadd Goffa.
3. Cerddor a Bardd Gwyneth Glyn yn gwisgo'r ffrog (llun Terry Mills)
4. Gwahoddiad i'r Senedd yng Nghaerdydd
5. Dr Catrin Jones gydag Eluned Morgan AS, Gweinidog Iechyd a Gwasanaethau Cymdeithasol, yn y Senedd.