Mae milwyr ymhob oes wedi defnyddio'u hamser hamdden i wneud gwaith celf a chrefft i'w anfon adref, i'w werthu am fwyd neu sigarennau, neu i goffá cyd-filwyr colledig. Gwnaed y darn hwn gan beiriannydd yng Nghatrawd Frenhinol Sir Fynwy i goffá cyd-filwyr a fu farw yn Ypres a St. Eloi yn ystod y Rhyfel Byd Cyntaf.

Tref yng Ngwlad Belg yw Ypres, ar y ffin gyda Ffrainc ac wedi ei lleoli mewn ardal strategol bwysig. Roedd ymladd erchyll yno drwy gydol y Rhyfel Byd Cyntaf. Mae St. Eloi ychydig i'r de. Gellir gweld maint y colledion yn yr ardal drwy edrych ar nifer y mynwentydd: cyfanswm o 171, a 47,000 o feddau. Mae mwy na 100,000 o ddynion wedi'u coffá ar gofgolofnau yng Ngwlad Belg; ni chladdwyd dros 50,000 ohonynt.