Llythyr i Thomas Benbow Phillips gan Evan Evans, 17 Rhagfyr, 1851

Disgrifiad

Llythyr ysgrifennwyd at T B Phillips Ysw, yn Nova Cambria, Pelotas, Rio Grande do Sul, Brasil, gan Evan Evans, Brynmawr dyddiedig 12 Rhagfyr, 1851

Diolchodd Evan Evans i Thomas Benbow Phillips am y parseli a gyrhaeddodd yn ddiogel, ac eglurodd iddo gyfieithu'r llythyr, a'r rheiny o eiddo Morgan Jones, David Davies a John Davies a'u hanfon, un bob wythnos, i'r “Amserau”. Oherwydd fod newyddion anffafriol am fywyd yn Nova Cambria wedi eu cyhoeddi mewn cylchgronau Cymreig, ni fu llawer o sôn am ymfudo yn ystod y misoedd diwethaf. Roedd Evan Evans yn gofyn a fyddai modd anfon llythyrau mwy calonogol ato, er mwyn i gannoedd ystyried ymfudo. Roedd, fodd bynnag, yn nodi fod pryderon gan y Cymry am ryddid crefyddol ym Mrasil, gan mai Pabyddiaeth oedd crefydd y wlad. Mynega eto ei bryder na all fforddio talu £10-£11 y flwyddyn tuag at ei Bolisi Bywyd, gan holi a fyddai modd cynorthwyo tlodion gyda'u costau ymfudo a'u galluogi i ad-dalu'r gost dros gyfnod o nifer o flynyddoedd, gan fod cost ymfudo i Awstralia yn rhad iawn. Cyfeiria Evan Evans at deulu tlawd iawn ond gonest o rieni a thair merch oedd yn awyddus iawn i ymfudo, ond heb fodd i dalu eu ffordd. Byddent yn
ad-dalu'r ddyled trwy waith caled, petai'r tocyn teithio yn cael ei dalu drostynt. Gofynna Evan Evans i Thomas Benbow Phillips wneud ymholiadau am John ac Isaac Griffiths, y cryddion. Roedd gwraig a mam-yng-nghyfraith John yn poeni am nad oeddynt wedi derbyn ateb i'w llythyr. Roedd ei wraig a'i blant yn fodlon ymfudo neu ei groesawu adref i Gymru.