Stori yr U 91

Yng ngwanwyn 1918, roedd llong-U U 91, dan reolaeth Alfred von Glasenapp, yn patrolio sianel Iwerddon. Roedd y llong-U wedi gadael ei phorthladd yn Heligoland ar 10 Ebrill 1918 ac wedi cael cryn lwyddiant. Erbyn 25 Ebrill, roedd hi eisoes wedi suddo pum llong. Ar 26 Ebrill, daeth ar draws yr ETHEL, sgwner bren, 19 milltir oddi ar arfordir Sir Benfro, yn cludo cargo o lo o Gaerdydd i New Ross. Gwelodd criw’r ETHEL y llong-U a gadawsant eu llong ar frys, gan ddianc yn y badau achub.
Ni laddwyd yr un aelod o griw’r ETHEL, ond wrth adael ar frys gan ofni am eu bywydau anghofiwyd am gi’r llong a’i adael ar ôl. Mabwysiadwyd y ci gan y criw Almaenig a’i ailenwi’n Lotte.
Arhosodd Lotte gyda’r tanforwyr am weddill eu patrôl llwyddiannus o amgylch Cymru pan aethant ymlaen i suddo’r GRESHAM, WALPAS, ORONSA, DAMÃO a RAYMOND mewn byr amser.
Aeth von Glasenapp a chriw’r U 91 ar ddau batrôl arall, gan suddo mwy o longau, ac i von Glasenapp orffen y rhyfel yn gapten llong-U llwyddiannus a enillasai nifer o fedalau. Allan o’r 498 o gapteiniaid llongau-U, ef yw’r 24ydd mwyaf llwyddiannus o ran nifer y llongau a gafodd eu suddo neu eu difrodi. Suddwyd 52 o longau a difrodwyd chwech arall gan y ddwy long-U y bu’n gapten arnynt. Bu farw ym 1958 yn 75 oed.