Anfonodd Humphrey Jones y llythyr hwn, dyddiedig 12 Medi 1854, at ei rieni o Lundain. Mae'n ymddiheuro am beidio ag ysgrifennu yn gynt. Mae'r colera yn ddrwg iawn mewn rhai ardaloedd ond mae Hackney yn ddigon iach ar hyn o bryd, gyda hanner dwsin o achosion yn unig. Dywed Humphrey fod 'y lle wedi ei draeinio yn dda'. Gan fod y tywydd wedi bod mor braf mae Humphrey yn cymryd yn ganiataol fod ei rieni wedi gorffen gyda'r cynhaeaf bellach. Dywed ei fod yn bwriadu aros yn ei swydd bresennol am flwyddyn arall gan ei fod yn dysgu llawer. Mae'n mynychu'r capel bob bore Sul. Roedd wedi bwriadu mynd i'r Gymdeithas neithiwr ond bu'n rhaid iddo weithio'n hwyr yn y siop ac felly bydd yn rhaid iddo aros am y cyfarfod misol nesaf.