Anfonodd Humphrey Jones y llythyr hwn, dyddiedig 31 Awst 1854, at ei rieni o Lundain. Ymddiheura fod cymaint o amser wedi mynd heibio ers iddo ysgrifennu, ond dywed fod llawer o 'saldra o gwmpas'. Esbonia mai 'tân a cholera sydd yn creu fwyaf o stir yn Llundain yn bresenol'. Roedd tân gerllaw yr wythnos ddiwethaf, wrth ymyl capel y Bedyddwyr Saesneg, a llosgwyd stordai un o gwmnïau fferyllwyr mwyaf Llundain ddoe. Nid yw'r tywydd yn helpu'r sefyllfa chwaith gan fod y colera yn fwy tebygol o ymledu. Yn ôl Humphrey, mae pobl yn dychryn gormod ac yn tueddu i feddwl eu bod yn dioddef o colera. Mae eraill yn tybio ei fod yn hawdd dal y salwch ac yn dychryn pan maent yn clywed am achosion gerllaw.