Tiwnig y March-heddlu, dechrau'r 20fed ganrif

Disgrifiad

Mae hanes y march-heddlu'n cychwyn ym 1760 pan gyflwynodd Syr John Fielding, ('the Blind Beak'), gynlluniau er mwyn mynd i'r afael â'r holl ladron-pen-ffordd a oedd yn bla ar ffyrdd Llundain. Roedd y patrôl gwreiddiol o 8 dyn mor llwyddiannus fe'u cynyddwyd i dros 50 erbyn 1805. Roedd March-heddlu Bow Street (The Bow Street Patrol) yn diogelu pob priffordd o fewn 20 milltir o Charing Cross.

Dros y blynyddoedd, mae dyletswyddau'r march-heddlu wedi newid i ddiwallu anghenion y gymdeithas. Gyda dyfodiad y rheilffyrdd, diflanodd y lleidr-pen-ffordd, ond mewn ardaloedd gwledig roedd dwyn anifeiliaid yn broblem gynyddol. Roedd y march-heddlu ar flaen y gad wrth rwystro troseddwyr yn y maes hwn ac oherwydd bod y gwaith yn cael ei ystyried yn beryglus iawn roeddynt yn aml yn cario dryllau a cleddyfau.

Mae swyddog ar gefn ceffyl mewn sefyllfa da i ymdrin â grwpiau mawr o bobl, ar unrhyw achlysur. Gan ei fod yn eistedd yn uchel ar anifail cyflym a chryf uwchlaw'r dyrfa, mae'r swyddog yn weladwy iawn i'r sawl sydd angen cymorth ac mewn lle delfrydol i ddiogelu eraill a gweinyddu'r gyfraith. Dyma swyddogaeth bwysig aelodau'r march-heddlu hedddiw ac mae eu presenoldeb yn ystod gwrthdystiadau a digwyddiadau seremonïol neu chwaraeon wedi bod yn werthfawr tu hwnt o safbwynt gweinyddu'r gyfraith. Gan fod y ceffylau wedi eu hyfforddi yn wych ac yn ymddwyn mor dda, maent yn aml yn ffefrynnau gyda'r dorf, ac eto yn medru codi ofn mewn sefyllfaoedd mwy anghyfeillgar.