Llythyr ysgrifennwyd at Thomas Benbow Phillips gan Michael D Jones yn Y Bala, dyddiedig 17 Mai 1872

Roedd Michael D Jones newydd dderbyn llythyr Thomas Benbow Phillips, dyddiedig 4 Ebrill. Roedd papurau Buenos Aires, ac yn benodol y River Plate Mail wedi bod yn condemnio'r Wladfa heb sicrhau fod eu ffeithiau'n gywir. Nid oedd y cnwd gwenith yn wych, ond roedd y gwartheg yn llewyrchus, ac roedd digonedd o fenyn a chaws. Nid oedd Michael D Jones yn credu y byddai'r Gwladfawyr yn rhoi'r ffidil yn y to er fod 14 ohonynt wedi llofnodi petisiwn yn gofyn am fwy o wartheg. Credai fod pobl Patagones wedi colli masnach gyda'r Indiaid oherwydd fod y Cymry yn eu trin yn well. Roedd gan lywodraeth Buenos Aires long oedd yn ymweld â'r Wladfa bob deufis, ac roedd yn cario ymfudwyr o Fuenos Ayres i'r Bae Newydd. Dwrdiodd Michael D Jones Thomas Benbow Phillips am beidio â gwneud unrhyw ymdrech i fasnachu oherwydd fod pobl wedi gwneud arian mawr o fasnach y plu estrys a guillango. Roedd 30 o ymfudwyr wedi gadael Efrog Newydd ar y “Rush”. Roedd yr ymosodiad ar y Wladfa wedi gwylltio pobl Efrog Newydd. Roedd Michael D Jones wedi ei wahardd rhag gweithio oherwydd gor-flinder, ond roedd yn erfyn ar Thomas Benbow Phillips i beidio â chario gwirod i'r Indiaid, oherwydd credai y byddai hynny'n dinistrio'r Wladfa yn y pen draw.