Mary Annie Davies yn cyflwyno’r faner a greodd ar gyfer Merched y Wawr Cangen Bro Cennech ym 1990
Yn y llun mae Linda Sidgwick, Mary Annie Davies, Nellie Evans
Cefndir Cangen Merched y Wawr Bro Cennech
Ar ddechrau 1989(??) daeth criw niferus ynghyd i drafod cychwyn cangen o Ferched y Wawr yn Llangennech. Gwahoddwyd Llywydd y Rhanbarth, Hazel Charles Evans i’r cyfarfod i esbonio beth fyddai’r camau angenrheidiol a buan y sefydlwyd y pwyllgor cyntaf sef Linda Sidgwick, Llywydd, Mareth Lewis, Ysgrifennydd a Patricia Jones, Trysorydd.
Roedd pawb yn frwdfrydig iawn ac roedd nifer o gwestiynau i’w hateb – beth fyddai enw’r gangen? ble byddem yn cyfarfod? pryd byddem yn cyfarfod a phwy fyddai’n creu ein baner?
Roedd dewis gwraig i lunio’r faner yn hawdd gan fod un o’n haelodau sef Mrs Mary Annie Evans wedi ennill y wobr gyntaf yn Eisteddfod Genedlaethol 1962 am ei gwaith gwnïo cain. Cytunodd i ymgymryd â’r dasg a bu’n gweithio yn ddyfal am wythnosau yn chwilota am y deunyddiau gorau er mwyn creu baner a fyddai’n cynrychioli’r gangen newydd. Bu cryn drafod ar yr hyn yr oedd yr aelodau am ei gyfleu ac fe benderfynwyd mai dangos cyfuniad o ochr ddiwydiannol ac ochr amaethyddol yr ardal fyddai’r nod. Llwyddodd Mrs Evans i greu baner grefftus sy’n dangos ei dawn i frodio’n gywrain gan amrywio lliw a phatrwm yn ddeheuig. Mae’r pwyllgor presennol yn sicrhau bod y faner yn cael ei gosod mewn lle amlwg ar ddechrau pob cyfarfod ac rydym yn ymhyfrydu yn y ffaith fod baner Bro Cennech yn un faneri gorau’r mudiad.