Roedd John Jones neu 'Coch Bach Y Bala' (1854-1913) yn leidr adnabyddus a enillodd enwogrwydd oherwydd iddo gael ei garcharu mor aml, ac hefyd oherwydd iddo lwyddo i ddianc o'r carchar ar sawl achlysur. Roedd hefyd yn cael ei alw'n 'The Little Welsh Terror' a 'The Little Turpin'. Ym 1913 llwyddodd i ddianc o Garchar Rhuthun ond fe'i saethwyd gan dirfeddiannwr lleol yn Llanfair Dyffryn Clwyd ac fe waedodd i farwolaeth. Er gwaethaf ei ffaeleddau, roedd yn gymeriad poblogaidd a mynegwyd cryn anfodlonrwydd cyhoeddus ynglŷn ag amgylchiadau ei farwolaeth. Claddwyd ef yn Llanelidan.