Yn frodor o Landdarog, treuliodd Alun Voyle y rhan fwyaf o’i fywyd yn gweithio yn y diwydiant llaeth yn Sir Gaerfyrddin. Gwnaeth ei wasanaeth milwrol ar ddiwedd y 1950au gyda Chyffinwyr De Cymru yn Aberhonddu ac yna cyfnod yn yr Almaen. Wedyn dychwelodd i Gaerfyrddin i weithio yn y ffatri laeth ym Mhensarn yn gynnar yn y 1960au. Dechreuodd yn y ffatri yn gwneud caws ac yna wedyn yn gyrru lorïau i gasglu chyrns o'r ffermydd a danfon llaeth Ynysoedd y Sianel i laethdy'r Hafod yn Abertawe. Mae Alun yn rhannu atgofion hapus o’i fywyd ffatri laeth ac o gasglu chyrns o ardaloedd Pencader / Dolgran a Brechfa. Mae'n sôn am y cymunedau amaethyddol a'r arferion yn yr ardaloedd hyn. Mae'n sôn am yr her o gasglu chyrns yn ystod gaeaf eira 1963 ac mewn hafau poeth. Wedi hynny treuliodd 32 mlynedd yn gweithio i adran ffrwythloni artiffisial y Bwrdd Marchnata Llaeth yng Nghaerfyrddin. Mae'n myfyrio ar y newidiadau a gyflwynwyd ar ddiwedd y BML. Yn ogystal, mae ei bersbectif hirdymor yn peri iddo bryderu am y dirywiad cymdeithasol, ieithyddol ac economaidd y mae bellach yn ei weld yng nghefn gwlad Sir Gaerfyrddin. Cynhaliwyd y cyfweliad yn Gymraeg yng Nghaerfyrddin gan Anthony Rees (prosiect stondin laeth Sir Gaerfyrddin). 23 Ebrill 2024.