Ar ôl y Rhyfel Byd Cyntaf, danfonwyd sgrol coffa yn enw’r Brenin i deulu’r holl filwyr a fu farw o ganlyniad i’r rhyfel. Danfonwyd y sgrol yma at weddw Sarsiant John Regan. Ganwyd Sarsiant John Regan ym Mhenarth ar 1 Mai 1882. Ymunodd fel gwirfoddolwr i ymladd yn y Rhyfel Byd Cyntaf. Roedd yn dad i deulu mawr o bedwar bachgen a merch. Roedd ei wraig hefyd yn disgwyl plentyn arall, a anwyd ar 6 Mai 1916 tra bod John yn paratoi i groesi i Ffrainc. Yn anffodus, ni chafodd y cyfle i gwrdd â'i ferch ieuengaf. Bu farw John ar 31 Gorffennaf 1916. Mae bellach wedi ei gladdu ym Mynwent Filwrol Peronne ger Maricourt ar y Somme, yn agos at y fan lle y bu farw.