Lansiwyd 'HMS Duke of Wellington', banerlong enwog Syr Charles Napier, yn Noc Penfro ym 1852. Dyma lun ohoni cyn i'r mastiau a'r hwyliau uchel gael eu hychwanegu.
Drwy gydol yr 1850au, cynhyrchodd Iard Longau Penfro llongau rhyfel pren olaf y Llynges Frenhinol ac fe chwaraeodd ran arloesol wrth ddatblygu'r llongau ager cynnar. Cafodd 'HMS Duke of Wellington' a llongau mawrion pren eraill y degawd eu trawsnewid wrth iddynt gael eu hadeiladu i gario ager. Cawsant eu torri yn hanner ar y slip a'u gwneud yn hirach i wneud lle i'r boeleri a'r peiriannau.
Lansiwyd yr 'HMS Duke of Wellington' tri llawr yn wreiddiol fel yr 'HMS Windsor Castle' ar 14 Medi 1852, ar yr un diwrnod a bu farw'r 'Iron Duke' (h.y. Dug Wellington) yn Walmer. Newidiwyd ei henw rai diwrnodau yn ddiweddarach er anrhydedd iddo.
Gwasanaethodd yr 'HMS Duke of Wellington', oedd â 131 gwn, fel banerlong yn y Baltig yn ystod Rhyfel Rwsia. Cafodd ei diraddio i wasanaeth yr harbwr yn ddiweddarach a'i defnyddio fel un o'r llongau cyflenwi ar gyfer y llynges yn Nociau Portsmouth.

Ffynhonnell: Lawrence Phillips, 'Pembroke Dockyard' in David W. Howell (ed.), 'Pembrokeshire County History. Volume IV. Modern Pembrokeshire 1815-1974' (Haverfordwest: Pembrokeshire Historical Society, 1993), tudalen 158.