Cyflwynwyd y model hwn o long tri-mast i Ymddiriedolaeth Forwrol Seiont II ym 1988. Yn anffodus, ychydig iawn a wyddys am hanes y model a'r sawl a'i gwnaeth. Adeiladwyd y math hwn o long yn ystod y 1870-80au ac mae manylder y gwaith yn awgrymu bod y model yn seiliedig ar long go iawn. Efallai bod y gwneuthurwr wedi treulio cyfnod yn gweithio ar y llong. Fodd bynnag, ni chafodd llong debyg i hon ei chofrestru dan yr enw 'Arvon'.