Setl dderw a wnaethpwyd rhwng 1889 a 1894 gan Richard Davids, Caernarfon, yn anrheg i Syr William H. Preece

Disgrifiad

Cafodd y setl hon ei gwneud o wahanol ddarnau o dderw cerfiedig a ddaeth o wahanol eglwysi, tai a thafarndai. Cafodd ei gwneud rhwng 1889 a 1894 gan Richard Davids, Caernarfon, yn anrheg ar gyfer Syr William H. Preece, arloeswr yn maes telegraffi di-wifr.

Daw'r asen uchaf o drawst a ddaeth o do hen dŷ Cefnycoed; roedd y panel gothig uchaf unwaith yn rhan o groglen eglwys Llanllyfni; daw'r asen ganol o drawst yn eglwys Llanllyfni; daw'r ddau banel allanol ar y cefn o ddwy arch flawd o Boduan, a hen baneli o wahanol ffynonellau anhysbys. Daw'r ddau banel canolog o hen gist dderw o Sir Efrog neu Swydd Derby. Daw'r pum mwntin ar y cefn rhwng y paneli o ddarn o'r groglen yn eglwys Llanllyfni, trawst o eglwys Boduan a thrawstiau o hen dafarn yr 'Old England', Pendist, Caernarfon, ac o Blas Puleston yn Stryd y Plas, Caernarfon. Daw'r asen isaf yn y cefn, y coesau ôl, y coesau blaen, y sedd a'r asen flaen o dan y sedd, oll o hen dŷ Cefnycoed, a'r breichiau o do eglwys Beddgelert. Daw'r ddwy asen ochrol o dan y sedd o hen drawst yn Tŷ Isa ger Waunfawr, a hen ffermdy ger Llanddeiniolen. Daw'r asennau isaf o wahanol hen dai yng Nghaernarfon. Yn ôl yr hanes, cafodd y darnau a roddwyd yn y panel uchaf gothig er mwyn llenwi tyllau eu tynnu o ddarn o wely'r Tywysog Llywelyn. Daw'r hoelion pren o hen ddarn o dderw yn nho eglwys Llanbeblig.