Tynnwyd y ffotograff gan Geoff Charles. Yn sgil y cynllun mawr i adeiladu cronfa ddŵr Tryweryn a boddi pentref Capel Celyn (Cwm Tryweryn) a'r ysgol leol, aeth Geoff Charles ati i dynnu lluniau'r disgyblion. Roedd y cwbl ond dau o'r deg disgybl yn dwyn y cyfenw Jones, sef: Jane Watkin, Rhian, Lowri Mair, Arfon, Ann Elizabeth, Euron, Geraint, ac Eurgain; Tryweryn Evans ac Elwyn Rowlands oedd y ddau blentyn arall. Mrs. M. J. Roberts oedd athrawes yr ysgol. Cyhoeddwyd y ffotograff hwn yn 'Y Cymro', 1 Tachwedd 1962.

Ym 1955, cyhoeddodd Corfforaeth Lerpwl ei bwriad i adeiladu cronfa ddŵr newydd yng Nghwm Tryweryn, gan foddi pentref Capel Celyn, i'r gogledd o dref y Bala. Lansiwyd ymgyrch ddygn i wrthwynebu'r cynlluniau gan drigolion ac awdurdodau lleol, unigolion a sefydliadau cenedlaethol, ond er gwaethaf pob ymdrech ni lwyddwyd i rwystro'r datblygiad ac ar 1 Awst 1957 pasiwyd Deddf Corfforaeth Lerpwl. Dechreuodd y gwaith ar y safle dair mlynedd yn ddiweddarach ac fe gwblhawyd y cynllun ym mis Awst 1965.