Gellir lawrlwytho cynnwys at ddefnydd anfasnachol, megis defnydd personol neu ar gyfer adnoddau addysgol.
Ar gyfer defnydd masnachol cysyllwch yn uniongyrchol gyda deilydd yr hawlfraint os gwelwch yn dda.
Read more about the The Creative Archive Licence.
Disgrifiad
Cynhwysion
- llond dysgl o flawd ceirch (neu flawd llymru)
- chwart o ddŵr oer
- hanner llond cwpan o laeth enwyn
Dull
- Rhoi’r blawd ceirch yn wlych yn y dŵr oer a’r llaeth enwyn a’i adael i suro am ryw dri neu bedwar diwrnod.
- Yna hidlo’r cymysgedd drwy ogr mân gan wasgu’r trwyth yn llwyr o’r blawd.
- Berwi’r trwyth yn gyflym mewn sosban a’i droi’n gyson â phren llymru (neu lwy bren).
- Codi ychydig o’r cymysgedd ar flaen y pren, ac os gwelir ei fod yn ffurfio cynffon fain wrth ddisgyn yn ôl i’r sosban ystyrrir bod y llymru wedi berwi i’r ansawdd priodol.
- Tywallt y llymru i ddysgl fawr ar ôl ei gwlychu â dŵr oer ymlaen llaw, a’i adael i oeri ryw gymaint. Byddid yn ei fwyta mewn llefrith oer neu ddŵr a thriog.
Llanuwchllyn, Meirionnydd.
Bwyteid llymru i frecwast neu i swper, yn arbennig ym misoedd yr haf.
Llangwnadl, Caernarfon.
Yr oedd llymru yn fwyd di-guro pan fyddai anhwyldeb yn yr arennau.
Llanuwchllyn, Meirionnydd.
Yr un bwyd yn ei hanfod yw’r hwn a elwir yn ‘llymru’ yn siroedd gogledd Cymru â’r ‘sucan’ neu’r ‘uwd sucan’ a ddisgrifir isod. Mewn llythyr at ei frawd Rhisiart, y mae Lewis Morris yn ysgrifennu yn y flwyddyn 1760 ‘…toccins yw arian cochion yn sir Faesyfed a sucan neu uwd y gelwir llymru yno’.
‘Roedd y pren a ddefnyddid i droi’r llymru yn amrywio o ran enw ac o ran maint a ffurf, e.e., gelwid ef yn ‘myndl’ yn sir Drefaldwyn, ‘mopran’ neu ‘bren llymru’ yn sir Gaernarfon, ac ‘wtffon’ neu ‘rhwtffon’ yn sir Feirionnydd.
Clywir adrodd y cwpledau a’r dywediadau canlynol ar lafar gwlad:
Llymru lled amrwd
I lenwi bol yn lle bwyd.
Llangybi, Caernarfon.
Llymru llwyd da i ddim Cyn llwyted â llymru.
Ond i lenwi bol rhag isho bwyd.
Parc, Meirionnydd.
Croen uwd a chreifion llymru.
Gwerin Eiriau Sir Gaernarfon.
Oes gennych chi wybodaeth ychwanegol am yr eitem hon? Gadewch sylwad isod
Sylwadau (0)
Rhaid mewngofnodi i bostio sylw