Cynhwysion

• darn o gig eidion (coes-las)
• ‘pen gora’r ag’ (best end of a leg of lamb)
• moron
• pannas
• erfinen (swedsen)
• winwns bach
• tatws
• cennin a phersli
• dŵr
• fflŵr

Dull

• Gorchuddio’r darnau cig â dŵr a halen mewn sosban fawr, codi’r dŵr i’r berw ac yna mud-ferwi’r cig am awr neu ragor cyn rhoi’r llysiau yn y cawl.
• Hollti’r moron a’r pannas ar eu hyd, torri’r erfinen yn ddarnau heb fod yn rhy fân, a’u rhoi yn y cawl. (Bydd y swm a roir o bob un ohonynt yn dibynnu ar faint y sosban ac ar chwaeth bersonol.)
• Berwi’r llysiau hyn am ryw ychydig cyn ychwanegu’r cennin (wedi’u torri’n fân) a’r tatws atynt, gan ychwanegu ychydig o ddŵr hefyd os gwelir bod angen hynny.
• Cymysgu ychydig o fflŵr gwyn â dŵr oer a’i arllwys yn raddol i’r cawl i’w dewhau pan fo’r llysiau a’r cig wedi berwi digon.
• Rhoi’r persli mân yn y cawl am ryw ychydig o funudau yn unig cyn codi’r cawl gan ei fod yn dueddol o felynu’r cawl.
• Codi’r cawl i fasnys neu i blatiau cawl a malu bara iddo.
• Codi’r tatws, y llysiau a’r cig i blatiau a’u bwyta ar ôl y cawl.

Dowlais, Morgannwg.
Un o’r prydiau a baratoid i ginio nos y glowyr yn ne Cymru oedd hwn.