Awyrgylch unigryw

Chwaraewyd rygbi ar safle Stadiwm y Mileniwm am y tro cyntaf ym 1876, ar dir yn eiddo i Ardalydd Bute y tu ôl i westy’r Cardiff Arms.

Curodd Cymru Iwerddon yn y gêm ryngwladol gyntaf ar y maes ym 1884, ac erbyn troad y ganrif roedd Parc Yr Arfau wedi datblygu’n stadiwm yn dal dros 40,000 o gefnogwyr.

Ym 1905 heriodd Cymru dîm diguro Seland Newydd. Atebwyd yr haka gan Hen Wlad Fy Nhadau a sgubodd Cymru i fuddugoliaeth o 3-0.
Dyma’r tro cyntaf i anthem gael ei chanu cyn gêm ryngwladol, a daeth Parc yr Arfau yn enwog ar draws y byd am ei awyrgylch unigryw fu’n llwyfan i sawl buddugoliaeth fawr i Gymru dros y 60 mlynedd nesaf.