Y cwpan cyntaf
Syniad Awstralia a Seland Newydd oedd cynnal Cwpan Rygbi’r
Byd, ac yn y ddwy wlad honno y cynhaliwyd y twrnamaint
cyntaf. Seland Newydd oedd yn fuddugol – y wlad lle mae
rygbi’n obsesiwn.
Dan gapteniaeth y sgolor o fewnwr, David Kirk, sgubodd y Crysau
Duon eu gwrthwynebwyr o’r neilltu yn y grwˆp. Felly hefyd yr
Alban yn y rownd go-gynderfynol, a Chymru yn y rownd
gynderfynol. Yn y rownd derfynol, gyda’r blaenasgellwr Michael
Jones yn serennu, roedd blaenwyr Seland Newydd yn drech na’r
Ffrancwyr a’r tîm yn llawn haeddu teitl ‘Pencampwyr y Byd’.
Gêm orau’r twrnamaint yn ddi-os oedd y rownd gynderfynol
rhwng Ffrainc ac Awstralia. Munudau oedd yn weddill, gyda’r sgôr
yn gyfartal, 21-21, pan ymestynnodd yr athrylith Serge Blanco
bob gewyn i sgorio yn y gornel. Ffrainc enillodd y gêm sy’n cael
ei chyfri gan nifer hyd heddiw fel ‘yr orau erioed’.
Ar ôl colli’n drwm i Seland Newydd yn y rownd gynderfynol,
dangosodd y Cymry eu cymeriad i guro Awstralia yn Rotorua a
hawlio’r trydydd safle.
Doedd canlyniad y gystadleuaeth ddim yn sioc i neb – Seland
Newydd oedd tîm gorau’r byd. Bychan fu maint ac effaith
masnachol y Cwpan Rygbi’r Byd cyntaf hwnnw, ond roedd yn
wawr newydd. Roedd y byd rygbi ar fin newid am byth.