Mae’r panel olaf yn cynrychioli dyfodol SyM a rhoddwyd cyfle i bob aelod o Ffederasiwn Powys
Maesyfed frodio rhywbeth ar y panel. Mae’r geiriau, sy’n ymledu o’r canol satin lliw aur mewn
brodwaith llaw ac appliqué, sef teulu, plant a chartref, yn coffau gweithgareddau, gobeithion a
chyflawniadau SyM.
Mae’r panel yn dathlu popeth sy’n bwysig i SyM heddiw ac wrth fynd ymlaen i’w ganrif nesaf. Mae’r gair ‘future’ mewn eurwaith ar groen llo ar y llinell amser yn cynrychioli gobeithion a dyheadau’r sefydliad.
Mae’r panel hwn yn crisialu amrywiaeth y sefydliad, corff sydd â’i wreiddiau’n ddwfn mewn cymunedau ond sydd hefyd â phersbectif byd-eang ar faterion o bwys. Darlunnir hyn gan yr awyr sidan wedi’i baentio â llaw, gyda chortynnau lliw aur ac arian, wedi’u gosod gyda phwythau gorwedd, sy’n cynrychioli pelydrau’r haul yn ymledu ymlaen ac i fyny i alaethau wedi’u gwneud
o gromliniau wedi’u pwytho gyda gleinwaith ar y sidan a’r les, ac i lawr at gefn gwlad Sir Faesyfed lle mae’r bryniau wedi’u brodio â llaw ac â pheiriant gan ddefnyddio edafedd cotwm a gwlân ar ffelt wedi’i wneud â llaw a’i baentio, gyda gleinwaith a rhwydwe yn cynrychioli afon a rhaeadr. Mae’r defaid wedi’u brodio gan ddefnyddio cylymau bwlion, mae’r gwartheg mewn appliqué wedi’i frodio â llaw, ac maent yn sefyll o flaen ysgubor a wnaed o les Mam-gu. Mae pyffiau Suffolk yn cynrychioli’r blodau yng ngardd y tŷ fferm.

Mae’r adeiladau ar waelod y panel yn cynrychioli cymuned drefol a gwledig gyda phensaernïaeth
o’r 1800au i’r adeilad tra modern sy’n cynrychioli 2015 ymlaen. Mae’r tai o 1910 gyda thair simnai
a’r byngalo o’r 1920au wedi’u brodio mewn pwyth croes mân, gyda blodau mewn gwaith ffeltio
â nodwydd yn yr ardd a thros y llinell amser gydag ymylon crosio.
Mae gan y tŷ pâr mewn brodwaith â llaw a gwaith appliqué forder bach mewn smocwaith llaw sy’n
cynrychioli cennin Pedr o Gymru; mae’r bloc o fflatiau o’r 1960au mewn ffabrig appliqué ar galico
gyda brodwaith llaw i’r lein ddillad a dysgl lloeren wedi’i gwneud â pheiriant. Mae Coleg Denman mewn brodwaith du. Darlunnir yr adeilad tra modern mewn ffabrig metelaidd lliw arian â phlastig clir drosto i gynrychioli gwydr, ac mae rhuban sy’n cynrychioli cerrig wedi’i wnïo ar ben â pheiriant. Mae coeden mewn ffabrig treuliedig gyda ffens ar y chwith, ac mae’r coed uwchben
wedi’u crosio.
Mae’r barcud sydd wedi’i frodio mewn pwyth satin a phwyth hir a byr yn cynrychioli’r amgylchedd
ac yn hedfan i fyny o fathodyn y ffederasiwn tuag at ddiwylliant a chymuned, trwy eiriau sy’n dangos diddordebau SyM.
Mae’r llinell amser clytwaith yn cynrychioli mynd yn ôl at y pethau sylfaenol, sy’n dod yn bwysig ar adegau o lymder, ac yn rhedeg i ffwrdd i’r dyfodol, gan gymysgu â deunydd pefriol lliw aur ac arian gan ddefnyddio crefftau sy’n creu diddordeb o’r newydd ar hyn o bryd yn Ffederasiwn Powys Maesyfed a’r tu hwnt.
Mae bathodyn y ffederasiwn wedi cael ei wneud gan ddefnyddio brodwaith llaw ac appliqué ar satin ar ffurf cylch gyda WI yn y canol ac enw’r ffederasiynau o’i gwmpas.
Dyluniwyd y bathodyn yn y 1980au mewn ymateb i gystadleuaeth gan ffederasiwn y sir.
Wedi’u darlunio ar banel Ffederasiwn Powys Maesyfed mae’r themâu sydd wedi aros yn ddigyfnewid yn ystod 100 mlynedd oes SyM; poeni am yr amgylchedd, cynhyrchu bwyd, iechyd, addysg a sgiliau traddodiadol i enwi ond ychydig. Mae’r materion a adlewyrchir yn y themâu hyn yr un mor berthnasol heddiw ag yr oeddent 100 mlynedd yn ôl. Mae’r newid yn yr hinsawdd yn fygythiad i’r amgylchedd, mae’r ffordd y cynhyrchir bwyd wedi newid yn ddirfawr gyda mwy o fewnforion, mae gwasanaethau iechyd yn dal i beri pryder mawr ac mae addysg i oedolion o dan fygythiad, fel y mae rhai o’r sgiliau crefft traddodiadol.
Mae un edefyn bythol yn rhedeg drwyddynt i gyd, sef cyfeillgarwch, cymuned a chymorth a’r ffordd y mae merched, wrth gydweithio, yn gallu creu newid. Bydd cyfraniad merched wrth gynnal eu teuluoedd a’u cymunedau, y newid yn eu rolau, a nodi materion sy’n bwysig i ferched, yn sefyll prawf amser.
Bydd cryfder a bywiogrwydd SyM a gweithredu cadarnhaol gan ei aelodau, fel y’u darlunnir dros y can mlynedd diwethaf yn y paneli hyn, yn dal i fod yn bwysig ac yn werthfawr wrth i’r sefydliad symud ymlaen i’w ganrif nesaf.
Mae’r dyfyniad canlynol gan y Dywysoges Alexandra, oedd yn aelod o SyM, wrth iddi annerch y
Cyfarfod Cyffredinol Blynyddol ym mis Mehefin 1961, yn crynhoi popeth sy’n dda am Sefydliad y Merched:‘Un o bleserau mwyaf ein haelodaeth o SyM yw, beth bynnag fo ein hoedran, rydym yn dal i edrych ymlaen, dysgu a chynllunio pethau newydd a gwell.
Gwerth a phwysigrwydd enfawr ein sefydliad gwych yw’r budd a ddaw i gymunedau lleol o’r cynigion sy’n cael eu trafod.’