Dyma un o lythyrau cynharaf Mary Granville (1700-1788) (Mrs Delany yn ddiweddarach) o gasgliadau Llyfrgell Casnewydd. Ar y tudalen hwn, mae hi'n sôn am ei hymweliad â'r opera.

Ganed Mary Granville yn Coulston, Swydd Wiltshire, yn ferch i deulu aristocrataidd a dylanwadol. Priododd Alexander Pendarves, Aelod Seneddol oedrannus, ym 1718 ond bu yntau farw ym 1725 a symudodd Mary i Lundain lle daeth yn wyneb cyfarwydd ar achlysuron cyhoeddus a chymdeithasol. Ym 1743 priododd Patrick Delany, clerigwr o'r Iwerddon. Bu farw ym 1788 yng Nghastell Windsor. Yn ystod ei bywyd ysgrifennodd Mary nifer fawr o lythyrau at ei ffrinidiau a'i theulu. Cafodd y llythyrau hyn eu cyhoeddi a'u golygu mewn chwe chyfrol ym 1861-2 gan ei gor-nith Arglwyddes Llanofer (Augusta Hall, neé Waddington) (1802-96).