Margaret Bevan yn nyrsio mewn ysbyty yn India, Mai 1917

Disgrifiad

Ganwyd Margaret Walker Bevan yn Abertawe ar 22 Hydref 1883, yr hynaf o ddwy ferch John a Harriet Bevan. Ym mis Mai 1902 fe ddechreuodd ar hyfforddiant i fod yn nyrs yn ysbyty dinas Coventry. Wedi cwblhau ei hyfforddiant sylfaenol, fe aeth i weithio yn Ysbyty Becket, Barnsley, gan godi i safle Matron erbyn 1915. Yna fe ymddiswyddodd er mwyn ymuno â'r Welsh Military Hospital, Netley (ger Southampton) ym mis Gorffennaf 1915, gan wirfoddoli i wasanaethu dramor. Roedd yr ysbyty hwn, a oedd â 399 o welyau ynddo, yn cael ei ariannu gan gyfraniadau gwirfoddol o Gymru. O fewn ychydig wythnosau wedi i'r British Expeditionary Force groesi'r sianel ym 1914 roedd yr ysbyty yn trin milwyr a anafwyd yn y Rhyfel Mawr. Ym mis Mai 1915 derbyniwyd gorchymyn i drosglwyddo staff ac offer yr ysbyty draw i India, fel uned i drin 3,000 o gleifion. Roedd yn rhaid i'r nyrsys ymuno â'r Queen Alexandra's Imperial Military Nursing Service (QAIMNS) a byddai'r ysbyty yn cael ei ail-leoli yn Deolali India o dan yr enw '34th Welch General Hospital'. Ar y ffordd i India fe dreuliodd y staff ryw dair wythnos yn Alexandria lle buont yn cynorthwyo mewn ysbytai milwrol. Wedi glanio yn Bombay, tua 20 Mehefin, fe aethant mewn grwpiau bach i fyny i Deolali fel y deuai'r wardiau'n barod. Roedd gan Margaret ofal dros ward â 70 o welyau ynddi, yn gofalu am filwyr a oedd wedi gwasanaethu yn Basra. Yn ddiweddarach, danfonwyd carcharorion rhyfel o Dwrci i'r adran hon. Tynnwyd y llun hwn ym mis Mai 1917 ac mae'n dangos Ward 11 yn yr ysbyty yn Deolali, gyda Margaret yn sefyll ar yr ochr chwith.