Ysgrifenna Owen o Ffrainc ac mae'n siomedig mai dim ond rhan o'i lythyr diwethaf a dderbyniodd Lizzie. Creda ei fod wedi ysgrifennu rhywbeth na ddylai fod wedi gwneud ac arweinia hyn iddo sôn am y chwithdod o gael rhywun yn agor eich post yn enwedig os mai llythyr caru ydyw. Gofynna ynglŷn ag iechyd ei ffrindiau a'i gymdogion. Mae'n parhau i fod yn y ffosydd, ac am y pythefnos diwethaf mae wedi bod gyda'r cogydd yn 'Helping Him to burn the water'. Cafodd cogydd y swyddogion ei glwyfo yr wythnos diwethaf ynghyd â dau o gogyddion Manceinion. Bu'n rhaid i Owen a'i gydweithwyr symud o'u safle yr un noson. Dywed Owen eu bod yn 'going through something out Here, but the Ground about Here is Nothing like it was about Passendale' [sic]. Gobeithia Owen weld ei deulu'n fuan; mae'n gobeithio y bydd y cyfan drosodd yn fuan. Mae wedi derbyn parsel o'r 'Llan-Committee' yn cynnwys crys a phâr o sanau.