Erbyn diwedd y bedwaredd ganrif ar bymtheg roedd gan Landeilo cyfran dda o leoliadau perfformio, megis y capeli, y Neuadd Ddinesig (Neuadd Fictoria), Neuadd y Farchnad ac Eglwys Sant Teilo. Roedd gan y rhain galendrau llawn o gyngherddau, digwyddiadau codi arian, ac eisteddfodau, a oedd yn denu cynulleidfaoedd o bell ac agos. Ar un adeg, cynhaliwyd sawl eisteddfod yn y dref bob blwyddyn, megis y 'Semi-National Eisteddfod', eisteddfodau'r capeli, Eisteddfod Gadeiriol y Plant, ac eisteddfodau cyffredinol, fel yr enghraifft yma, a oedd yn cael eu hadnabod fel cyfarfodydd cystadleuol hefyd. Amanwy (Ammanwy) oedd arweinydd yr Eisteddfod hon, a gynhaliwyd yn y Drill Hall (Neuadd Ddinesig heddiw) yn 1923. Gweddi y Pechadur gan Morfydd Llwyn Owen oedd y darn prawf i’r sopranos.