Y Ddaear yw’r unig blaned yn y bydysawd â bywyd arni, hyd y gwyddom. Mae rhai creigiau gwaddodol yn cael eu ffurfio trwy weithgarwch pethau byw. Cafodd y calchfaen hwn ei greu gan organebau morol microsgopig, sy’n secretu cregyn amddiffynnol o galsiwm carbonad. Pan mae’r anifeiliaid yn marw, mae’r cregyn yn parhau ac yn caledu’n galchfaen.

Mae bywyd yn effeithio ar y Ddaear mewn sawl ffordd. Yn wir, bywyd a greodd yr atmosffer o’n cwmpas. Mae planhigion yn amsugno dŵr a charbon deuocsid, dau beth sy’n cynnwys ocsigen. Maen nhw’n defnyddio’r carbon mewn carbon deuocsid a’r hydrogen mewn dŵr i greu cemegolion o bob math, ac yn rhyddhau ocsigen fel deunydd gwastraff. Mae anifeiliaid yn bwyta planhigion i gael egni, ac yn dychwelyd dŵr a charbon deuocsid yn ôl i’r amgylchedd.