Print o Broad Street yn y Drenewydd, Sir Drefaldwyn tua'r flwyddyn 1848, wedi ei atgynhyrchu ar ffurf cerdyn post cynnar. Mae'r olygfa hon yn edrych o'r Bont Hir dros Afon Hafren i gyfeiriad canol y dref. Ar wahân i'r ffaith ei fod yn rhoi golwg ar fywyd stryd drefol y cyfnod, mae'r llun yn ddiddorol oherwydd iddo gynnwys hen neuadd y farchnad sydd i'w weld yma yng nghanol y stryd. Roedd adeiladau o'r math hwn, gyda marchnad dan do ar lefel y stryd ac ystafell fawr uwchben ar gyfer cyfarfodydd a materion gweinyddol y dref, yn nodwedd o'r rhan fwyaf o drefi marchnad ar un adeg. Ychydig iawn ohonynt sydd wedi goroesi hyd heddiw.