Tynnwyd y ffotograff gan Geoff Charles. Mae'r haint mycsomatosis sy'n effeithio ar gwningod yn cael ei achosi gan firws. Yn ystod y 1950au cynnar, ymledodd yr haint i Brydain o Ffrainc gan arwain at ostyngiad sylweddol iawn yn nifer y cwningod. Ym 1954 cafwyd cadarnhad bod mycsomatosis wedi cyrraedd Sir Drefaldwyn - sef ardaloedd Llanbryn-mair, Aberhosan a Phen-y-bont-fawr. Yn ôl yr hanes, roedd cyrff cant o gwningod marw a heintiedig wedi cael eu darganfod bob can llath ar hyd un lôn.