Roedd afonydd Dyffryn Conwy yn gyforiog o bysgod, gan gynnwys eog a brithyll y môr neu sewin. Rhwng aber afon Conwy a rhaeadrau Betws-y-coed defnyddiwyd nifer o ddulliau pysgota, yn eu plith pysgota â chwrwgl a chewyll.

Cwch bach, hirgrwn, heb gilbren, ar gyfer un pysgotwr yw cwrwgl Dyffryn Conwy. Byddent yn cael eu defnyddio mewn parau gyda rhwyd yn ymestyn rhyngddynt. Ar ôl llusgo’r rhwyd i lawr yr afon byddai’r pysgotwyr yn gorfod cario’r cwryglau yn ôl ar eu cefnau.

Lluniwyd cwryglau drwy orchuddio ffrâm o ddelltennau pren â chroen anifail. Erbyn y 1800au defnyddiwyd cynfas wedi ei gorchuddio â phyg neu dar.